Tao N na bon anga moa te kakaitau nakon te Tautaeka n New Zealand (NZ) n aron te scheme aio are e initiate ibukin kamwaingakiia ara koraki ni I-Kiribati mai Kiribati nako NZ ibukin karekean te kabwaia. I taku bwa e a rangi ni maan naba te waaki aio ao bon iai kabwaka iai ao n akea te katamaroa nako iai e ngae ngke iai tangitang aika a tia n roko inanon baia Minita n te Tautaeka ni Kiribati ake a roroko ikai ao e a bon tia naba tatabekaki nakoia taan mwakuri n te NZ Immigration. Aikai kabwaka tabeua ake a tia n noraki ao n namakinaki irouia ara koraki tabeman:
1. Ngkana ko a reke n te PAC scheme ao bon akea am mwakuri ae tauraoi i New Zealand, ko na bon kakaea am mwakuri n rokom i NZ.
2. Ngkana ko a roko i NZ riki n taai aikai ao kanga e a bon rangi ni kanganga reken te mwakuri ngkai e kakouaaki bwa e a rangi ni keerake mwaitin te unemployment iaon NZ.
3. Ngkana ko a roko ni kakaea am mwakuri iroun te employer i NZ ao e a manga tuangko bwa iai am work permit ke akea. Ngkana akea ao e aki kona ni butimwaeko.
4. Ngkana ko a manga tuangiia kaain te NZ immigration bwa a na anganiko am work permit ao a manga tangira moa am job offer mai iroun te employer. E nang kanga n reke am job offer ao ngaia te employer e tangira moa te work permit? ao e nang kanga n reke te work permit ngkai te NZ Immigration e tangira moa te job offer?
5. Ngkana e a manga reke am job offer ao ngaia iai job offer aika a butimwaeaki ao iai naba aika aki butimwaei man te NZ Immigration riki taian job offer ibukin te seasonal jobs.
6. Ti kakoaua bwa angiin mwakuri aika a rangi ni kainanoaki i NZ bon taian farm jobs ma are angiina a manga aki butimwaeaki man te NZ Immigration.
7. Ngkana e aki rereke am job offer nte timeframe are anaganiko kaain te NZ Immigration ao a decline naba am permanent residence application ao a karokoa naba am reta bwa ko na kitana te aba.

E kakoauaaki bwa iai tabeman I-Kiribati ake a tia ni kabanea aia mwane ae mwaiti ibukin mwanangaia nako NZ ngke a reke n te PAC scheme ao a tia ngkai ni kaokaki bwa e a bon bongata tikuia iaon NZ ao e aki reke aia job offer. Iai naba nikiraia kaain te PAC n te ririki ae nako aika a bon tiku naba ngkai ni kakaei aia job offer ao tao iaon naba kaokakiia ngkana e a manga aki naba rereke. Ti kakoaua naba bwa iai naba 75 ngkai aika a manga reke naba nte PAC n te ririki aio ao a manga tauraoi naba n roko.

A bon kawa ara botannaomata ngkana aron aio ngkai ae e teimatoa ni waaki inanona te PAC scheme. Au kaunganano nakoia ake a mena inanon te kanganga aio bwa a na teimatoa ni kakae ao ngkami kaain Kiribati iaon NZ ake tao iai taabo aika kam atai ae e na kona n reke iai te job offer kama ibuobuoki n reitaki n te rerio are ni katoa tairikin te Kanimabong bwa ti a ongora iroumi.