Tao iai te maroro n te tabo teuana ae iaon te atu ni iango naba aio ma I a kua ni kakaea ao e aki reke irou.

E aoria ma aio (noria inano ikai) ngkanne te kaeka teuana are e kan tibwaia nakoira temanna naba te i-Nikunau iaon te atu ni maroro ane oti i eta. E tuai karin n te maneaba aio iaan bukina ane e bon barabara naba n ana maroro...

Dear Tauanei,

 

Mauri! I aki kaaina Aan Nikunau wesite atr … bwa I aki kakoaua te iango are a karaba araia aomata i aan araia ni karaba n te web/internet. Tao ko bon ataia ae I a kaman aki tatangira te aekaki anne bwa titebo ma ae ko taetae n te mwaneaba i mataia te koraki ao ko karaba ubum. E ngae n anne, ao I boni karinea naba inaomataia aomata ni karaoa anne.

 

Iai te bwai ae I rangi n tabeaianga iai n ana kaoti Metutera Jnr. ni kaineti ma te titiraki bwa e nga te ara ae e riai ni bwainaki, “Tei Nikunai ke Nikunauan”. E rikirake tabeaiangau bwa I tuai man nora raun nanou ni kaeka ake a tia ni mwamwekaki irouia ake a tia ni maroro i aon aei ao naake a tia naba ni kaeka n aroia Karaiti etc … ni kaineti ma aio ngaia ae I a bubuti karaneneakiu – tao mani maninganingan te mwaneaba. N na butiko ngkanne bwa ko a karina au maroro aei n te Aan Nikunau site. Tao N na iangoa riniu rimwi riki ngkana a moanna aomata ni “kaoti raoi ubuia” n tain aia maroro n aron ae e a karaoia ngkai Metutera Jnr. i mwin ana titiraki Koae.

 

Aio au karinrin ….

 

Aio au koaua ae I nene ni matoa iai. I kaitauia naake a tia ni kaatamaumaua aia ukeaba ni kakaea te ara ae e tonu ibukin abara. E ngae n anne, ao I taku bwa a uaia n tibara ma kiton te kantaninga ara aika “Tei Nikunau” ao “Nikunauan”. Nikunauan bon renganan aran abara ma te taeka ni kaoti bwaibwai/aomata/reitaki ae –an n te taetae ni I-Matang n aron are e a tia n oti irouia taani maroro. Bon te bwai teuana nanon Tei Nikunau.  Akea nanou ngkai ao ikai ni kani kana ami tai ao ni kanangananga aan ami kantainga ni kabwarabwara nanon te taeka ae tei bwa are kam boni bane n ataia ngaki boni I-Kiribati ngaira. I rarikin nanon tei akana a otara, ao e boni kona naba ni iangoaki at a philosophical level bwa e aki tau ae ti te tei n tauraoi ma e a kakaawaki riki te kakamwakuri. Ngkana te koaua mwanewen kunan abara are “te tia katane mwaneka Nikunau” (ngai temanna ae I kakoua anne) ao ti riai n ota bwa e aki tane te mwaneka n ti te teitei. E aki koaua ae a waaki rake aba ake tabeua n ararakea te kibaimoa ma te tabomoamoa ao e tei Nikunau.  E aki “toka i aon atibuna” n te aro ma te anua anne! N au koaua ao n otau ae e reme n te taetae ni Kiribati ma koreana ao I taku bwa te ara ae e na kan ao n tonu ao ni bakarerea kabitoitoin te kantaninga are e maroroakinaki ngkai bon te taeka ae “Te I-Nikunau”.  

 

Kam rabwa ao kabwara buren te maroro ma te iango. Tiaki nanou te kani kabura arin karabinoan te iango, ma e boboto i aon tangiran uarokoan te maroro n etina, kanna ma tonuna ike e na “oti ma n raneanea otana” iai ao ni kanene ao ni kakabwaritaake i aon ana atinikana iai abara ae e tangiraki.

 

Raomi ae bon te I-Nikunau naba mai Tenguingui i Rungata,