Abau ae Nikunau bon te aba ae men i mainikun aonon Kiribati ni kabane. I tataneiai ni maeka tao tii
teniua namwakaina ni katoa ririki n ririki aika 1958 ni karokoa kabaneana 1999. Ngkana I kan kabwarabwara taekan abau aio ao e na bon rangi n abwabwaki ma I ti kan kaoti baika a karika Nikunau n taai ake rimoa bwa te aba ae kakamimi. Te moan bwai bon taekan te baneawa are oro neneana ao are rangi n tatangiraki irouia bon kaain Nikunau ao aomata ake tiaki kain Nikunau aika tia ni katonga kanakina. Ngke e a roko te ika ae te Tilapia, ao e bon birinako naba kakanaton te nei aio ae arana Nein Riiki bwa e a bua kangkangin te baneawa. Te nei aio e bon bwainaki iaan te katei kanga te mwaneaba, bwa iai taan tararuaia ibukin kaongoakin aonteaba bwa e na bunraki kanoana te tawa, iai taan taraia naba be ea ikawai kanoana ibukin rienakina ke eriakina be nang kanaki kanoana. Ngkana e nang eriaki kanoana ai bon tain te 'mao', Te mao bon tain te amwarake irouia taan erieri ni kurubu nako akea kanaia ae na manga nakon temanna ae tiaki kaain aia mao ke aia kurubu. Ngkana e karaoaki anne ao taian kurubu a mena iaan bataia man aki aiua ba a kamaturaoia ibukin aia baneawa bwa e na aki aiua ni kitaniia n tain te erieri. Ko kona ngkanne ni kakoua ngkana ko bon ira te erieri n taiana. iai manin te roto ao te bokaboka n tain te erieri. Ngkana e rangi n tikiraoi natim te aine ao taekan Nikunau ae moan te kakawaki e kangai ai kangangara natim te aine aio "Boni manin te roto"
Te roto bon taekan Nikunau ni kamoamoa tikiraoin te aine e reke te taeka aio man taekan te nei. Kabwara au bure ma N na katokia moa ikai I a manga ongora reitakina ao tiribureakina ngkana I kairua iai.