Mauri Arieta,
Bon te koaua nee aron aia katei kaain Beru ba I nooria naba iroun tibu ae Ruuta. Ngkana e tangira kanana te ben ao e tuangko ba e na riai n ti teuana oreana ma ngkana e aki raeuaaki n oreana anne ao e a tau aakea te kangi ben. I a taku nakoina ba eaera ngkai e na ti teuana oreana? ao e taku, "Ko aki ataia ae ma'itin orean am ben a warewarekia aomata ba m'aitini kanam?" E uara ngkanne te aekaki anne? E a tia ni mate tibuu ma ngke I a nako ni kareke nakoa ni makuri ao e a boni irai nako naba ba te tia kaawakinai. Boni ngaia naba ae kabungai irouia natiu aika au karimoa ao e tobaia naba ni karokoa e aikoa konabai. Bon te tia kabung tibu aio ao e maamakaki ba ngkana e aki riiringa birotom ao e bon aki kona ni kabungko ngaia are ngkoe te aine ngkana ko tangiria ba e na kabungko ao ko na riai n rooroko ba e na kaetieta raoi natim. Te aekaki naba are ngkana iai ae aoraki ao e aki kona ni kaangai I rabakau ma nakomai ba N na buokiko ba n aia katei naba ni I-Beru a bon taningaa naba weteakina. E bon teimatoa naba te katei anne ni karokoa ngkai ke a bitaki? E raba naba te maroroo ao I nangi ni kani kinaia au koraki iaoni Beru ma taian riki ma ngkana iai iroumi ae rabakau rikiiu ni kauaitera ao taiaoka ni kateia raoi nakoiu ba N na karaoa aia boki ni kateiriki natiu ma tibu aikai. I ongo ba iai te unnaine ae kakaawakin aban Kanoanikie ao ngke e ongo ae roko Terauno are natin maneeu i Beru ao e roko ni uotia ba e na noori aban tibura. Ngai I ti kan nako Beru ba I kan nooria au koraki ao taekan aaba kai are tao are a maiu naba ara koraki ake i buki iai ba are ngaira i Toromon e nangi ni m'aiti naba abara ao bon ti ngaira teniman. Tao I kona n ti taua teuana ibukin manera are mitinare ba kan nooran tibura are Kanoanikie. E bon roko te taeka irouu ngke I mena i Samoa ba N na nako ni karaoi aaba ma e aki reke m'anangau ba akea te tia taraia natiu n taai akanne. Maneu ma tariu a bane ni katikui taekan aaba nakoiu ibukina ngke bon te ikawai ngai ti tebo naba ma abara i Toromon. I karab'aia tamara ma tinara n aron aia kairiiri ba ti na rabakau ni b'aina te karinerine ao ngaia ae I a nooria inanon au waaki ma tariu ae Terokoraoi ao maneu ae Tieri a bon aki aranai ba ti tariia ma m'aaneia ngai ae te ikawai ma aranai ba tinaia naba ngai ibukin naba aron tabeakinaia irou ngke e a kamani bua tamara ao boni ngai ae I taua te beku ni kareireiia mani karaoi baai ni kabane ake a tangiri mani kainnanoi ba are tinara e a boni kara naba ao bon akea naba ana reireii n aron te kareke m'ane ma moan te marurung tinara ni m'akuri n te o-n-aroka ao te karao bai ni Kiribati ibukin naba te anga ni kareke m'ane ao bon te tina ae koro arona n tararuai arora n aron ana kakaawakin te tina nakoia natina. Ti bon aki rootaki n te kainano ao I ataia ba te Uea e a tia ni iriiriira n taai nako. N aron ngkoa m'anangan Tieri nako Tangintebu ao e buubutii ba ti kona n tarai aroia natina ngkai e a bon aki m'akuri? Ti taku nakoina, naako karaoa am beku ibukin te Uea ao natim katikuia ba tabera. Ngai ma tariu ae Terokoraoi ti a boutokaa manera aio n te m'ane ba are akea te makuri i Tangintebu ngaia are ti a tibatiba aron te kanako mane ngai au tai nukan te nam'akaina ao tariu ana tai banen te nam'akaina ni karokoa e bon oti nako mai Tangintebu. Kanga bon aio naba te reirei nakoira ngaira te roro n rikirake iaoni Beru ba ti na baina te i tangitangiri n te utu ba ana manga kakairi iroura natira ma tibura aika tabe n rikirake. E raba naba te webside aio ba tia kakaaitibo inanona ma ni mamarooroakin bai aika ti kona n share ma tarira ao manera nako ni I-Beru. Tekeraoi ngkami kaain Beru ao te Uea iroumi n taai nako.